تحضير تشيز كيك سهل و اقتصادي

مكونات و طريقة تحضير تشيز كيك سهل

المقادير:

بالنسبة لطبقة البسكوت

استعملت 200 غ من اي بسكوت تحبيه و معاها 3 معالق زبدة كبار و دوبيها ( جاتني الطبقة خشينة الي تحبها رقيقة دير 140 غ بسكويت فقط)

نخلطوهم مع بعض و نحطوهم في مول التشيز كيك هداك الي ينفتح و الافضل تكوني فرشتيه بورق الزبدة

نوزعوه مليح و نضغطو عليه بكاس يكون القاع تاعو مسطح

ندخلوه للفرن على درجة حرارة 160 لمدة 10 دقائق

دوكة طبقة الكريمة

أستعملت 5 ياووغت طبيعي الي مافيهش سكر بصح بشرط تكوني قبلها ب 4 ساعات حطيتيه في مصفاة رقيقة كيما الي تتخلو بيها الفرينة

و خبيه يقطر من الماء الي فيه مليح مليح

– استعملت نص باطة جبن كيري يعني حوالي 100 غ على جال بنة الفرماج (يعني حوالي 6 حبات)

– نص كاس سكر او زيدي ادا حبيتي الحلاوة اكتر

– 3 بيض

– بشور حبة قارص و العصير تاعها

– مغرفة فرينة او نشاء

نخلطو بداية الياووغت و الفرماج و السكر ..بعدها نزيدو القارص معصور و البشور و الفرينة

بعدها نزيدو البيض بالحبة و نخلطوه غير قيس ما يختفي

ممكن نزيدو شوية حليب او كرام فراش حوالي نص كاس ..انا اكتفيت بنص كاس حبيب.. و هذا شكل الخليط

نحطوه في المول فوق طبقة البسكويت و نخلوهمدة 10 دقائق على درجة 220 و بعده نقصولو ل 150 مدة 40 دقيقة تقريبا

كي نشوفو القوام تاعو اشتد و الجوانب احمرت معناه طاب ..نطفو عليه و نخلوه نصف ساعة داخل الفور طافي

خليه يبرد و بعده حطيه في التلاجة مدة 4 ساعات على الأقل

زينوه بواش حبيته بالشكولاطة و لا جولي تاع القارص و لا الفراولة و لا خلوه هكداك

أنا حنا حطيتله مربى فراولة و خففته بشوية عصير تاع الفراولة و حطيتله مغرفة جيلاتين باه يحكم روحو و رجعته للفريجيدار

و الي تحب تكون طبقة الكريمة اكتر تضاعف المكونات

و ممكن تعويض الياووغت بالبتي سويس و بلا ما نحتاج نقطروه من الماء في الصفاية..نستعملوه مباشرة .